Brek verni šlovekov pretel?

Vih dnevi slušan čakuli o napadu breka na mićo dite ko je staro samo misec don, i to dok je bilo va svoje kamare i ležalo va letine. Brek je nekako opra vrota od kamari kad je cu da dite ploce. Sada ljudi govoro da je brek bi nervož na dite ca ploce i zato da ga je napa. Druge čakuli tvrdo da je brek ote pomoć i prnes dite matere. Ma zapensoj se, ćepo ga je za glovo. Brek je beštija i rekli bi da ne kapi, ali penson da dobro kapi ca je stori.  Breki kad bi oteli premestit svoje mlode na drugo mesto nježno hi ćepojo za vrot i nose hi.

Pošnela son se interešat za ta slučaj iako me na pocetke ni interešalo to. Ne moreš se oglušit kada se vesti, đornali i internet samo o temu pišo i ćakulojo. Tako san šla štet komentari od ljudi da vidin ca naš narod penso o temu. Bilo je interesantno štet perke neki so bronili breka, a krivili mater, oca i dite ca je van pameti jer to mićo dite od mesec don nanka nezno ca ga je tokalo. Oli brižni mat i otac , kakokemu more pas na mente da so oni faloma pustili breka va kameru i da hi ni bilo briga. Smešno.

Još mi je više bilo žol kada son cula da je mat od mole bilo joko brižna i škrbna prema njemu, a sada bi i njo oteli zapret va paržon. Zapensojte se da tako i vašo dite napadne brek, i da neznoš ko će živet ili umret, da bi vas oteli zapret ca ga ne tendite kako robi. Kao ca vi si znote  mola je još vaika va špitole va Zagrebe i pitanje je ko će zostati živo i kakove će posljedice imet.

Šetimonu don kašneje ležin na postelje i mat mi govori da je  va Podravine brek sejne pasmini opet napa, pogodite kega? Opet dite. A kade ga je ugriza? Za lice. Kamo drugamo. Jedina razlika je ca je brek bi vežen, a dite je pasalo lišo.

Iskreno rečeno volin breki. Lepo hi je videt kada se breki igrojo s dicon i kako se glado šnjimi. Ali opet s druge bondi mi stori jod kad cujen takovo grdo vijest. Dok jeni govoro da ti jedini nemore pokozat ljubov i poverenje  kako brek i da je on šlovekov najbolji pretel. Ja sejno vajka penson da nikad nemoreš bit sigur ca brek penso. Kako bi moja mat rekla: “Brek je brek, on je beštija i nikad neznoš ca brek penso”. Vero je u pravu. Lepo je imet breka kako ljubimca, lepo je igrat se šnjin i vodit ga na špaš, ali ca ćemo storit kad nas taj sejni brek va kega imamo poverenja napode. Je li ta  brek sejni kako nan se na pocetke paralo ili se s vremenom kambjo? Stojin kod svojega mišljenja da mići deca i breki ne gredo skupa koliko god hi je lepo za videt da se igrojo skupa. Ko već imate mićo dite potrudite se  da ti brek kega toliko volite ne skoće na saki jači zvuk kega cuje, ako ga ne pensote dresirat i držat vezanega dalje od vašeh deca kupite si zlotne ribice, penson da so one puno manje opasne od Argentinske doge.